របៀបនៃការប្រើប្រាស់ចំរោះទឹកទន្សាយ

ចំរោះទឹកស្អាតរូបទន្សាយរបស់ក្រុមហ៊ុនហាយដ្រូឡូជីកមានពីរប្រភេទ គឺ ទន្សាយសរ (អរីជីណល ទន្សាយ) និងស៊ុបភើទន្សាយ ទោះបីជាវាមានពីរប្រភេទក៏ដោយក៏គុណភាពរបស់ចំរោះទឹកទាំងពីរនោះ មានសមត្ថភាព ការពារមេរោគបានដូចគ្នា ហើយការប្រើប្រាស់ និងការថែទាំក៏ដូចគ្នា។ ខាងក្រោមនេះគឺជាការណែនាំអំពីការប្រើប្រាស់ និងការថែទាំចំរោះទឹកប្រកបដោយសុវត្ថភាព។

ការថែទាំ និងការប្រើប្រាស់ចំរោះទឹកប្រចាំថ្ងៃ

ចៀសវាងការប្រេះ ​

នៅពេលដែល លើកឬដាក់ផើងចំរោះ អ្នកត្រូវប្រុងប្រយ័ត្នជៀសវាងការធ្វើអោយផើងចំរោះបែក ឬប្រេះ។ ប្រសិនបើមានស្នាមប្រេះ ឬប្រហោង​អាចធ្វើអោយពពួកមីក្រូសារពាង្គកាយមួយចំនួនឆ្លងកាត់ឬជ្រាបតាមរន្ធប្រហោងឬស្មាមប្រេះនោះ ដែលធ្វើអោយទឹកមិនស្អាត ឬមិនមានសុវត្ថិភាព។ ប្រសិនបើផើងចំរោះមានទឹកពេញ ហើយវាមានលំហូរតិចជាង២.៥ ម៉ោង ទៅ៣ម៉ោង មានន័យថា អត្រាលំហូរគឺ យឺត ឬលឿនពេក ដូចនេះ អ្នកប្រើប្រាស់ត្រូវធ្វើការផ្លាស់ប្តូរផើងនោះចេញ។

មុនពេលប្រើប្រាស់ជាលើកដំបូង

អ្នកប្រើប្រាស់តម្រូវអោយចំរោះទឹកអោយបានយ៉ាងតិច ពី ៣ ទៅ ៥ផើង (ដង) ដើម្បីលាងសំអាតផ្ទៃផើងទាំងមូល ចំពោះទឹកដែលបានច្រោះហើយ អ្នកប្រើប្រាស់ត្រូវចាក់ទឹកនោះចោល ពីព្រោះផើងថ្មីវាអាចមានក្លិនដីឥដ្ឋ ឬព័ណ។

អ្នកប្រើប្រាស់ត្រូវដុះលាងសំអាតធុងស្តុកទឹក និងក្បាលរ៉ូប៊ីណេជាមួយទឹកសាប៊ូ រួចជូតអោយស្អាតជាមួយក្រណាត់ដែលស្អាតគ្មានមេរោគ ឬហាលថ្ងៃអោយស្ងួត។

ការប្រើប្រាស់ប្រចាំថ្ងៃ

ដាក់ចម្រោះទឹកនៅកន្លែងដែលមានសុវត្ថភាព ដែលជាកន្លែងដែលមិនអាចអោយធុងចំរោះទឹកងាយរអិលធ្លាក់ចុះ និងកន្លែងដែលមានអនាម័យល្អ។

ប្រសិនបើទឹកមិនស្អាត មានកករច្រើន អ្នកត្រូវយកក្រណាត់មកចងលើមាត់របស់ផើង ដើម្បីប្រមូលភាគល្អិតតូចៗចេញពីទឹក ដែលអាចធ្វើអោយចម្រោះមិនស្រក់ទឹកបានល្អ។ 

អ្នកត្រូវដាក់ទឹកអោយពេញៗផើងចំរោះ ព្រោះដើម្បីអោយចំរោះទឹកស្រក់ទឹកលឿន។ ចំរោះត្រូវបិទគម្របជានិច្ច ដើម្បី ការពារកុំអោយសត្វ ឬធូលីចូលក្នុងផើងចំរោះ។

វិធីសាស្រ្តដុះលាង

ផើងចំរោះទឹកត្រូវលាងសំអាតនៅពេលដែលមានករណីកើតឡើងដូចខាងក្រោម

·         លំហូរចាប់ផើងស្រក់ទឹកយឺតជាងមុន

·         ធុងស្តុកទឹកនិងក្បាលរ៉ូប៊ីណេចាប់ផើងកខ្វក់

·         ប្រើប្រាស់បានក្នុងរយៈពេល១ខែ ឬ១ខែ ក្រោយពេលប្រើប្រាស់

ជំហ៊ានទី ១ លាងផ្ទៃខាងក្នុងរបស់គំរប ជាមួយទឹកសាប៊ូ និងហាលអោយស្ងួត រួចដាក់គំរបនៅលើកន្លែងដែល​ ស្អាត។

ជំហ៊ានទី ២ លើកផើងចំរោះទឹកមកដាក់លើគំរបដោយប្រុងប្រយ័ត្ន ដោយចាប់កាន់តែមាត់របស់ផើងចំរោះទឹកតែប៉ុណ្ណោះ នៅពេលលើកផើងចេញពីធុង។ សូមកុំប៉ះពាល់នៅផ្ទៃខាងក្រៅរបស់ផើងចំរោះជាមួយដៃដែលមិនស្អាត ព្រោះដៃរបស់អ្នកអាចចម្លងមេរោគនៅផ្នែកខាងក្រៅរបស់ចំរោះទឹក។

ជំហ៊ានទី ៣  លាងធុងស្តុកទឹក រ៉ូប៊ីណេ ជាមួយទឹកសាប៊ូ និងទឹកស្អាត រួចហាលថ្ងៃអោយស្ងួតល្អ។

ជំហ៊ានទី ៤ យកទឹកចាក់ចូលក្នុងផើងចំរោះ បន្ទាប់ត្រូវយកច្រាស់មកដុសនៅផ្នែកខាងក្នុងផើង រួចលាងជំរះជាមួយទឹកដែលស្អាត។ ហាមប្រើប្រាស់ជាមួយទឹកដែលមានសាប៊ូ។

ជំហ៊ានទី ៥  បន្ទាប់ពីលាងសំអាតចំរោះរួច ត្រូវដាក់ផើងចំរោះចូលក្នុងធុងស្តុកទឹកវិញ ដើម្បីការពារការចម្លងមេរោគពីបរិយាកាស ផើងចំរោះមិនចាំបាច់ហាលថ្ងៃឡើយ។

អនាម័យល្អ

ហាមប៉ះពាល់ផ្នែកខាងក្រៅ​របស់ផើងចំរោះ ផ្ទៃខាងក្នុងរបស់ធុងស្តុកទឹក និងរន្ធរបស់រ៉ូប៊ីណេ ជាមួយដៃដែលមិនស្អាត។ លាងស្អាតដៃរបស់អ្នកមុនពេលប្រើប្រាស់ចំរោះទឹក ឬកែវទឹក ដើម្បីការពារការចម្លងមេរោគផ្សេងៗ។

អាយុកាលរបស់ចំរោះ

ផើងចំរោះគួរត្រូវបានផ្លាស់ប្តូរនៅពេលដែលមាន

·         ផើងចម្រោះប្រេះ ឬបែក

·         ផើងចម្រោះហូរយឺត ឬមានការសិករិចរិល ដែលធ្វើអោយផើងស្រក់ទឹកលឿន

·         ផើងចម្រោះត្រូវបានប្រើប្រាស់អស់រយៈ ៣ឆ្នាំ